Ein faß / welchs niemand füllen kan / Ein durst / den
niemand stillen kan / Ein haß / den man nicht enden kan / Ein
zorn / den man nicht wenden kan / Ein hoffen / voller angst
vnd forcht / Ein förchten / das auff hoffnung' horcht / Ein
vngetröste trawrigkeit / Ein' angestelte frölichkeit / Ein
haus / da keine sonne scheint / Ein garten / da nicht bäwme
seind / Ein garten / da man irre geht / Ein vest-verschlossen
rosenbeht / Ein obest / das nicht veste steht / Ein apfel
/ den der wind abweht / Ein ohne-frucht vnd weiden-bawm / Ein
selten-schlaff / ein steter trawm / Ein witwerbett' / ein wüster
raum / Ein mutig pferdt / frey / ohne zaum / Ein küner reiter
ohne pferdt. / Ein reicher schatz / bedeckt mit erd' / Ein
orgelwerck / ohn' Organist / Ein sparer / da kein zehrer
ist / Ein seitenspiel / ohn' allen klang / Ein aufferwachsen
/ ohne zwang / Ein schöner becher / ohne tranck / Ein wolverdienen
/ ohne danck / Jst einsamkeit vnd jungfrawschafft / Wo man
der starcken liebekrafft Erfahren muss. Drumb lob' ich euch
/ Herr bräutigam / vnd auch zugleich Euch jungfraw braut
/ daß jhr dem weh' Jtzt abzusterben durch die eh Bereit
seyt / vnd wünsch' euch dazu / Nach diesem tode / sanffte ruh'
/ Vnd nach der ruhe solche lust / Die solchen todten ist
bewust Vnd nach der lust denn wieder ruh. So bringt man
todt sein leben zu!
|